Presidenti i Dhomës së Përfaqësuesve, Mike Johnson ka konfirmuar se SHBA-ja po heton një rrjedhje të dokumenteve të klasifikuara që përshkruajnë një vlerësim amerikan të planeve të Izraelit për të sulmuar Iranin.
Dokumentet u publikuan në internet javën e kaluar dhe thuhet se përshkruajnë imazhe satelitore që tregojnë Izraelin duke lëvizur asetet ushtarake në përgatitje për një përgjigje ndaj sulmit raketor të Iranit më 1 tetor.
Bëhet e ditur se ato mund të ndaheshin vetëm brenda aleancës së inteligjencës “Five Eyes” të SHBA-së, Britanisë së Madhe, Kanadasë, Zelandës së Re dhe Australisë, shkruan BBC, përcjell Telegrafi.
Dokumentet thuhet se i atribuohen Agjencisë Kombëtare të Inteligjencës Gjeohapësinore të SHBA-së dhe Agjencisë së Sigurisë Kombëtare (NSA) dhe u publikuan në një llogari Telegram të lidhur me Iranin.
Sipas Johnson, anëtarit më të lartë të Kongresit, “rrjedhja është shumë shqetësuese”.
“Ka disa akuza serioze që po bëhen, ka një hetim në proces dhe unë do të marr një informim për këtë brenda disa orësh”, tha ligjvënësi republikan.
Siç raportohet, një dokument i referohet aftësive bërthamore të Izraelit – të cilat shteti hebre nuk i pranon kurrë zyrtarisht – ndërsa të dy janë marrë nga informacionet satelitore të 16-16 tetorit.
I pari titullohet “Izraeli: Forca Ajrore vazhdon përgatitjet për goditje në Iran dhe kryen një stërvitje të dytë të forcave të mëdha”.
I dyti titullohet “Izraeli: Forcat e Mbrojtjes Vazhdojnë përgatitjet kryesore të municioneve dhe aktivitetin e fshehtë të UAV-ve”.
Ai thuhet se diskuton lëvizjet e dronëve izraelitë. /Telegrafi/