SHBA është fajtori më i madh në botë për gjenerimin e mbetjeve plastike dhe vendit i duhet urgjentisht një strategji e re për të frenuar sasinë e madhe të plastikës që përfundon në oqeane, ka gjetur një raport i ri i dorëzuar qeverisë federale.
Sipas mediave të huaja, përcjell Telegrafi, ardhja e plastikës së lirë dhe të gjithanshme ka krijuar “një përmbytje në shkallë globale të mbeturinave plastike”, thuhet në raport, me SHBA-në një kontribues kryesor i plastikës së disponueshme që përfundon duke mbytur jetën detare, duke dëmtuar ekosistemet dhe duke sjellë ndotje deri në zinxhirin ushqimor.
Mbetjet plastike janë rritur ndjeshëm në SHBA që nga viti 1960, me vendin që tani prodhon rreth 42 milionë tonë metrikë mbetje plastike në vit, që arrijnë në rreth 130 kg mbetje për çdo person në Amerikë.
Ky total është më shumë se të gjitha vendet anëtare të Bashkimit Evropian së bashku.
Sasia e përgjithshme e mbeturinave komunale të krijuara në SHBA është gjithashtu dy deri në tetë herë më e madhe se vendet e krahasueshme në mbarë botën, thuhet në raport.
Pjesa më e madhe e kësaj plastike përfundon, nëpërmjet lumenjve dhe përrenjve, në oqeanet e botës.
Ndryshe në të gjithë botën, të paktën 8.8 milionë tonë mbetje plastike hyjnë në mjedisin detar çdo vit, ekuivalente me hedhjen e një kamioni plehrash të mbushur me plastikë në oqean çdo minutë.
Nëse tendencat aktuale vazhdojnë, shkencëtarët kanë vlerësuar se ky total mund të rritet në 53 milionë tonë në vit deri në vitin 2030, që është afërsisht gjysma e peshës së të gjithë peshqve të kapur nga oqeanet globalisht çdo vit. /Telegrafi/