"Mendojmë se mundësia e bisedimeve për statusin final të Kosovës është shterur, dhe se, nuk ka bazë për këtë deklaratë presidenciale”, u ka thënë Khalilzad gazetarëve në New York, pas konsultimeve që janë zhvilluar për hapat që duhet ndjekur në procesin e zgjidhjes së statusit të Kosovës, para mbledhjes së Këshillit të Sigurimit për këtë çështje, që është caktuar më 19 dhjetor.
"Tash është koha që Këshilli i Sigurimit të sjell vendim – përndryshe ky proces do të bartet jashtë OKB-së”, ka thënë Khalilzad, duke vlerësuar se shanset për marrëveshje të fuqive botërore janë minimale, marrë parasysh se Rusia tashmë njëherë e ka hedhur poshtë propozimin perëndimor për pavarësinë e mbikëqyrur të Kosovës, sipas planit të Martti Ahtisaarit.
Khalilzad po ashtu ka vlerësuar se propozimi rus për vazhdimin e bisedimeve, është i pakuptimtë, duke marrë parasysh faktin se, Treshja ndërmjetësuese e Grupit të Kontaktit, gjatë 120 ditëve të bisedimeve në mes të Beogradit dhe Prishtinës, i ka shterur të gjitha mundësitë për arritjen e një marrëveshjeje të tillë.
Ambasadori rus në OKB, Vitaly Churkin, ka deklaruar se u ka dorëzuar ambasadorëve të shteteve në OKB, elementet e propozimit për deklaratën presidenciale, sipas së cilës, Serbia dhe Kosova inkurajohen për vazhdimin e bisedimeve.
Për miratimin e një dokumenti të tillë kërkohet pajtimi i të gjithë 15 anëtarëve të Këshillit të Sigurimit të OKB-së.
Sidoqoftë, ambasadorët e shteteve anëtare të KS të OKB-së, as pas shumë orëve të konsultimeve të mbrëmshme, nuk kanë arritur të merreshin vesh për formatin e mbledhjes së 19 dhjetorit, që i kushtohet raportit të Treshes ndërkombëtare për bisedimet 120 ditëshe për statusin e ardhshëm të Kosovës, të zhvilluara në mes të Prishtinës e Beogradit.
Konsultimet do të vazhdojnë edhe sot, po në selinë e OKB-së në New York.