Ministri në detyrë i Inovacionit dhe kandidati i PDK-së për deputet, Muzafer Shala ka thënë se fokusi i PDK-së është fuqizimi i kompanive të IT-së që eksportojnë produkte jashtë vendit.
Shala, në “Debat Plus” me Ermal Pandurin në RTV Dukagjini, ka thënë se PDK ka fokus fuqizimin e sektorit privat dhe ndërmarrësit.
“Do të fuqizojmë ndërmarrësit që merren me shërbime “outsorcing” që është i vetmi sektor që ka bilanc pozitiv në eksport”, tha ai, përcjell Telegrafi.
Ai ka thënë se këto kompani kanë krijuar vende të reja pune dhe vazhdimisht ministria e Inovacionit është duke identifikuar ato kompani.
Ministri në detyrë i Inovacionit ka thënë se kanë marrë masa konkrete që të orientojnë të rinjtë në sektorët me perspektivë siç është ai i IT për të eksporuar produkte.
Ai thotë se është bërë edhe largimi i TVSH-së për produktet teknologjike që ka ndihmuar hapjen e vendeve të reja të punës.
“Do të edukojmë brezat e ri në mënyrë që t’i përgjigjen tregut të kërkesave punës. Ne jemi të interesuar të forcojmë kompanitë e IT-së në mënyrë që të sjellim kompani të reja dhe të hapim vende pune”, tha Shala./Telegrafi/
