Ministri i Mjedisit dhe Planifikimit Hapësinor, Ferat Shala ka pritur të premten ambasadorin e Norvegjisë për Kosovë dhe Shqipëri, Per Strand Sjaastad, me ç’rast u diskutua për vazhdimin e bashkëpunimit me projektet që janë mbështet nga Qeveria norvegjeze në fushat që mbulon kjo ministri, me theks të veçantë në sektorin e kadastrës.
Pasi e ka falënderuar për vizitën dhe ndihmën në vazhdimësi që i ka dhënë Qeveria Norvegjeze, MMPH-së e veçanërisht në çështjen e Kadastrës, ministri Shala e njoftoi diplomatin norvegjez me prioritetet dhe me reformat e brendshme që po bëhen në këtë ministri.
Në ndërkohë ministri Shala dhe ambasadori norvegjez u pajtuan në mundësinë e vazhdimit të bashkëpunimit dhe implementimin e një pjese të projektit të përbashkët Kosovë–Shqipëri “Profesionistët e Rinj për Zhvillimin ndërkufitar” të Komunave ndërkufitare Gjakovë-Has-Tropojë-Prizren-Kukës.
Ambasadori norvegjez Per Strand Sjaastad, e falënderoi ministrin Shala për gatishmërinë në vazhdimin e bashkëpunimit në mes Kosovës dhe Norvegjisë dhe po ashtu e njoftoi se janë duke i përgatitur planet për projekte për vitet 2018 e tutje.
Ndryshe, ministri Shala dhe ambasadori Sjaastad u pajtuan për vazhdimin e thellimit të bashkëpunimit reciprok.