“Të rinjtë ti kthehen natyrës, ndoshta atje, në rrethinën e pastër, më pak të ndotur, do ta gjejnë perspektivën e tyre. Seriozisht të mendohet për potencialet agronomike dhe ekologjike që i ofron Maqedonia si opsion për ardhmërinë e tyre, në vend që të jenë pjesë e shprehisë së pritjes për punë nga institucionet dhe para nga prindërit, porosisin aktivistët e “Slow Food të Rinj nga Maqedonia” (SFRM) të cilët po marrin pjesë në panairin e sivjetmë për ushqim tradicional “Terra Madre Salone del Gusto” në Torino, Itali, transmeton Telegrafi Maqedoni.
Sipas tyre, SFRM angazhohet për promovimin dhe aktualizimin e përfitimeve nga prodhimtaria e ushqimit tradicional, por edhe për hapje të të gjithë çështjeve të rëndësishme posaçërisht që i prekin prodhuesit e rinj, me qëllim të zgjidhjes së tyre.
“Tek ne është ardhmëria dhe kjo është përgjegjësi e madhe. Duhet t’i heqim paragjykimet se nëse je prodhues, fermer, bujk, bletar, nuk je i arsimuar, jeton në mënyrë monotone dhe ngec në gjithçka. Duhet të jemi më të edukuat, informuar, dhe në vend se të nënçmojmë, të dimë se secili që merret me këtë profesion kontribuon shumë, për njerëzit, kafshët, mjedisin, kujdeset për biodiversitetin, i ruan traditën dhe trashëgiminë kulturore”, ka thënë Biljana Mitrevska nga SFRM.
Çmimi i ulët blerës, konkurrenca jo luajale, plasmani jo i rregullt, barrierat administrative dhe marketingu agresiv i korporatave, shitoret e mëdha dhe industria, janë sfidat më të mëdha me të cilat ballafaqohen prodhuesit e rinj lokal të ushqimit tradicional.
Në “Tera Madre” në Torino, përmes një sërë punëtorive dhe konferencave, rrjeti i Slow Food të Rinjë nga e gjithë bota edhe një herë ka dërguar mesazhin se pikërisht prodhuesit lokal, të vegjël janë ruajtës të Tokës, të pasurisë së saj natyrore, të biodiversitetit dhe resurseve.
Midis temave kryesore të diskutimeve është edhe lidhja e mjediseve urbane dhe rurale – nëse, sa dhe pse kjo është e nevojshme./Telegrafi/.