Federata e Futbollit e Serbisë pret që deri në fund të vitit të merret vendimi për ankesën e saj për pranimin e Kosovës në UEFA, shkruan sot Koha Ditore.
Kosova në UEFA u pranua në fillim të majit, ndërsa vendimi u pasua me pranimin në FIFA dhe me përfshirjen e Kosovës në eliminatoret e ardhshme dhe të dy skuadrave në gara evropiane të futbollit. Megjithëse vendimi është i plotfuqishëm dhe tashmë i zbatueshëm, serbët të paktën publikisht shprehen se presin që vendimi në ankesën e saj të jetë pozitiv.
Të martën është raportuar se Gjykata e arbitrazhit sportiv në Lozanë ka formuar këshillin që deri në fund të vitit të marrë vendimin përfundimtar për ankesën e Serbisë ndaj pranimit të Kosovës në UEFA.
Gabriel Lansky, avokati austriak, firma e të cilit e ka bërë ankesën në emër të Federatës serbe në Lozanë, është shprehur i bindur se “Këshilli do të marrë vendim të drejtë që do të jetë në përputhje me rregulloret”.