“Trembëdhjetë vende kanë ndryshuar vendimin për njohjen e pavarësisë së Kosovës, kështu që pse jo edhe Franca”.
Kështu, së paku sipas asaj që shkruajnë mediat serbe, përcjell Telegrafi, mendon Alexis Troude, historian dhe një nga nismëtarët e peticionit në Francë për të tërhequr njohjen e pavarësisë së Kosovës.
Kjo, sipas tij, do të ishte shumë gjë e mirë për të zgjidhur situatën e përgjithshme në rajonin e Ballkanit Perëndimor.
Po sipas mediave serbe, bëhet fjalë për një nga njerëzit që kanë inicuar një peticion në Francë për tërheqjen e njohjes së Kosovës, i cili pritet të dërgohet edhe në Asamblenë Kombëtare.
Teksti i peticionit supozohet se u nënshkrua për më shumë se një ditë nga më shumë se 1,500 njerëz dhe qëllimi është që të ketë 100,000 nënshkrime të mbledhura deri në fillim të korrikut.
Por kush është ky historian, iniciativës të së cilit mediat serbe i kanë bërë kaq bujë?
Sipas disa pamjeve të publikuara në internet ai shihet, ndër tjerash edhe bashkë me disa protestues serbë, si dhe një foto në të cilën ai shihet bashkë me shefin e të ashtuquajturës Zyrë për Kosovën në Qeverinë e Serbisë, Marko Gjuriq.
Gjithashtu, në një video të mediumit të afërt me presidentin rus, Vladimir Putin, Troude bën analiza rreth rolit të Serbisë, ndërmjet “Bashkimit Evropian dhe Rusisë”.
Por, Troude është edhe autor i një libri në të cilin, sipas përshkrimit të librit, ai e konsideron Serbinë më shumë si një viktimë në luftërat që shpërthyen Jugosllavinë. /Telegrafi/