Shërbimi Spitalor Klinik Universitar i Kosovës ka bërë të ditur se fondacioni “Jahjaga” të cilin e udhëheqë, ish-presidentja e Kosovës, Atifete Jahjaga, ka blerë dhe dhuruar si donacion pajisjen “Sentinel Lymphnod Biopsy” (pajisje që shërben për identifikimin e nyjave limfatike të infiltruar me kancer), për Klinikën e Kirurgjisë Torakale, e cila do të lehtësojë trajtimin e pacienteve që kanë ndërhyrje në gjinj, duke mundësuar trajtim më të lehtë.
Drejtori i ShSKUK-së, Elvir Azizi, ka falënderuar ish-presidenten Jahjaga dhe Fondacionin që ajo udhëheqë për këtë donacion dhe për përkrahjen e vazhdueshme për ShSKUK.
Sipas tij, kjo dhe ndihmesat e tjera që janë si rezultat i angazhimit të ish-presidentes Jahjaga, do të mundësojnë trajtim më të mirë për gratë që marrin shërbime shëndetësore në QKUK.
Në anën tjetër, ish-presidentja, Jahjaga, tha se gjatë kohës sa ka takuar shumë gra të diagnostikuar me kancer, por edhe takimit me mjekë, është parë si e nevojshme të sigurohet kjo aparaturë që do të lehtësojë trajtimin e të gjitha grave që marrin shërbime shëndetësore në QKUK. /Telegrafi/
