Pak ditë pas një tentim-atentati, ku ish-presidenti Donald Trump pothuajse u vra në një tubim në Pensilvani, një folës në një tubim në Ohajo të hënën bëri thirrje për “luftë civile” nëse Trump nuk e fiton përsëri garën për Shtëpinë e Bardhë.
“Kam frikë nëse e humbim këtë, do të duhet një luftë civile për të shpëtuar vendin”, citohet të ketë thënë George Lang, një senator shtetëror nga zona e Cincinnati, shkruajnë mediat e huaja, përcjell Telegrafi.
Zyrtarët e fushatës së Trump nuk iu përgjigjën pyetjeve të HuffPost në lidhje me komentet e Lang, por rreth gjysmë ore më vonë, Lang kërkoi falje për ta në një postim në mediat sociale.
“Më vjen keq për komentet përçarëse që bëra në emocionin e momentit në skenë. Sidomos në dritën e atentatit ndaj presidentit Trump javën e kaluar, ne të gjithë duhet të jemi të vetëdijshëm për atë që thuhet në ngjarjet politike, përfshirë edhe mua”, shkroi ai.
My statement below on comments made earlier today: pic.twitter.com/44UziIPjSa
— State Senator George Lang (@LangForOhio) July 22, 2024
Dhe ekipi i fushatës së zëvendës-presidentes Kamala Harris, tani kandidatja e supozuar demokrate, ishte i shpejtë për të vënë në dukje se “thirrjet për dhunë nuk janë të reja në ngjarjet e Trump”.
“Donald Trump dhe JD Vance po drejtojnë një fushatë duke mbjellë hapur urrejtje dhe duke premtuar hakmarrje kundër kundërshtarëve të tyre politikë”, tha në një deklaratë zëdhënësi i fushatës së Harris, Ammar Moussa.
“Është një tipar, jo një gabim, i fushatës dhe mesazhit të tyre për popullin amerikan. Kjo është arsyeja pse një zyrtar republikan u autorizua të parashikonte një luftë civile gjatë prezantimit të këtyre kandidatëve”. /Telegrafi/