Ish-ministri i Punëve të Jashtme të Kosovës, Petrit Selimi, para nisjes së gjykimit për ish-krerët e Ushtrisë Çlirimtare të Kosovës (UÇK) të cilët ndodhen në Hagë, ka thënë se Gjykata Speciale është themeluar për shkak të presionit nga vendet perëndimore, si pasojë e raportit të Dick Marty.
Sipas ish-kryediplomatit, akuzat e përmendura në raportin e politikanit zviceran nuk janë vërtetuar asnjëherë.
“Kosova nën presion nga Perëndimi e ka krijuar Gjykatën Speciale për të trajtuar akuzën e ‘trafikimit të organeve’ që ishte në raportin e politikanit zviceran”, ka shkruar Selimi në Twitter.
“Lidershipi kosovar është akuzuar dhe ka qëndruar në paraburgim për 2 vite pa gjyq. Gjykimet fillojnë tani, por asnjë provë për ‘trafikim organesh’ nuk u gjet”, ka përfunduar ai.
Kosovo was pressured by West to establish a special court to tackle the “organ harvesting” accusation in report by Swiss politician. Kosovan leadership have been indicted and stayed in detention for 2 years without a trial. Trials starts now but no “organ harvesting” ever found. https://t.co/1Ac660xwo6
— Petrit Selimi (@Petrit) April 1, 2023
Më 3 prill do të nisë gjyqi ndaj ish-presidentit të Kosovës, Hashim Thaçi, ish-kryeparlamentarëve, Jakup Krasniqi dhe Kadri Veseli, dhe ish-anëtarit të Shtabit të Përgjithshëm të Ushtrisë Çlirimtare të Kosovës, Rexhep Selimi, në Dhomat e Specializuara në Hagë.
Ata akuzohen për krime lufte dhe krime kundër njerëzimit, të cilat thuhet se janë kryer kundër pakicave etnike dhe rivalëve politikë nga marsi i vitit 1998 deri në shtator 1999. Ata janë deklaruar të pafajshëm për këto akuza. /Telegrafi/