Deputeti i PSD-së Dardan Sejdiu, ka thënë se është e drejtë e Vetëvendosjes të kërkojë rrëzimin e Qeverisë Haradinaj përmes votave përcaktuese të Listës Serbe.
Ai në një postim në llogarinë e tij në Facebook ka shkruar se Partia Socialdemokrate do t’i bashkohet Glauk Konjufcës kur ai t’i sjellë nënshkrimet e së paku 49 deputetëve që nuk janë nga Lista Serbe.
Sipas Sejdiut kur të arrihet kjo, do të jetë e parëndësishme nëse Lista Serbe do të votojë ose jo rrëzimin e Qeverisë Haradinaj.
Ndërsa deputeti i LVV-së, Glauk Konjufca në një konferencë për media ka thënë se nëse Isa Mustafa është rrëzuar edhe me votat e Listës Serbe, pse mos të rrëzohet Qeveria Haradinaj.
“Shpend Ahmetit duhet t’i bëhet vetëm një pyetje, pse paska bo me rrëzu me votat e Listës Serbe, Isa Mustafën, e pse nuk bënë Ramush Haradinajn. Nëse është parimor, dhe nëse e ke vetë më votat e Listës Serbe, atëherë cili është dallimi që të rrëzosh një qeveri paraprake me votat e Listës Serbe, dhe tjetrën jo. Unë mendoj që nuk është të Lista Serbe fare, Shpend Ahmeti nuk e ka fare zorin të votat e Listës Serbe, e ka të rezultatet e sondazheve”, ka thënë ai.
Postimi i plotë pa ndërhyrje:
NËSE KONJUFCA MUND TA RRËZOJË QEVERINË HARADINAJ PËRMES LISTËS SERBE, NUK KA NEVOJË PËR PSD-në!
Glauk Konjufca vazhdon ta manipulojë opinionin publik duke thënë se Isa Mustafa ishte rrëzuar nga pushteti me votat e Listës serbe. Konjufca nuk e saktëson se asokohe, votat e Listës Serbe nuk ishin PËRCAKTUESE për rrëzimin e tij. Përkundrazi, ishin kalkulimet e partnerit të koalicionit ato që ia dhanë fundin.
Mbase është e drejtë e Lëvizjes “Vetëvendosje!” të kërkojë rrëzim të Qeverisë Haradinaj përmes votave PËRCAKTUESE të Listës Serbe, e cila përfaqëson agjendën e Beogradit në Kosovë. Që sot, Lëvizja Vetëvendosje mund t’i mbledhë votat dhe nënshkrimet e deputetëve të saj.
Mirëpo, në këtë proces, denigrimi i Partisë Socialdemokrate (PSD) nga ana e Lëvizjes Vetëvendosje është tepër shqetësues. Përgjithësisht, PSD akuzohet për oportunizëm dhe tradhëti opozitare ndërsa veçanërisht, refuzimi i saj për t’i pranuar votat e Listës Serbe shihet vetëm si arsyetim, e assesi arsye.
Për më tepër, deklarimet e Konjufcës bien ndesh me qëndrimet e përfaqësuesve të tjerë të Lëvizjes Vetëvendosje – por edhe të Lidhjes Demokratike të Kosovës – rreth llogaritjes në votat e Listës Serbe. Numër i konsiderueshëm i tyre (Rexhep Selimi, Sami Kurteshi, Lutfi Haziri, etj) kanë përsëritur disa herë publikisht refuzimin e tyre për ta pranuar votën serbe për rrëzimin e Qeverisë Haradinaj.
Partia Socidaldemokrate NUK e mbështet qëndrimin se përfaqësuesit e politikës qeveritare të Serbisë duhet ta PËRCAKTOJNË kohën dhe mënyrën e rrëzimit të qeverisë së Republikës së Kosovës. Për diçka të tillë PSD nuk jep vota në Kuvendin e Republikës. As sot, as nesër.
Partia Socialdemokrate do t’i bashkohet Glauk Konjufcës kur ai t’i sjellë nënshkrimet e së paku 49 deputetëve që nuk janë nga Lista Serbe. Kur të arrihet kjo, do të jetë e parëndësishme nëse Lista Serbe do të votojë ose jo rrëzimin e Qeverisë Haradinaj.
Deklarimet si ky i Konjufcës janë përpjekje që PSD-së t’i mveshet faji për mungesën e vullnetit dhe mençurisë në Lëvizjen Vetëvendosje në strategjinë e rrëzimit të qeverisë. Për më tepër, qëndrimet e këtilla vetëm sa e vështirësojnë tutje çfarëdo bashkëpunimi të efektshëm opozitar në proces./Telegrafi/