Gjykata e Apelit në Shkup sot do të zhvillojë seancë publike për rastin e “27 prillit”, ku akuzohen ish-drejtori i Byrosë së Sigurisë Publike, Mitko Çavkov, dhe 15 persona të tjerë.
Aktgjykimi i shkallës së parë për rastin u dha në mars të vitit të kaluar, ndër 16 të akuzuarit u dënuan me gjithsej 211 vjet burg për krimin e “rrezikimit terrorist të rendit shtetëror”.
Përveç ish-drejtorit të Byrosë së Sigurisë Publike Çavkov, mes personave të dënuar për krimin e deklaruar janë edhe anëtarë të tjerë të Ministrisë së Brendshme dhe Agjencisë së Inteligjencës.
Gjykatësja Dobrila Kacarska, e cila ka drejtuar rastin në Gjykatën Penale të Shkupit, në një deklaratë tha se Çavkov dhe oficerët e tjerë të policisë të akuzuar ishin njoftuar për ndërhyrjen e dhunshme në Kuvend, por nuk kishin ndërmarrë asnjë veprim për ta parandaluar atë./Telegrafi/