Gjykata Supreme e Kosovës, përmes një njoftimi për medie, bën të ditur se më 25 maj, e mërkurë, në Dhomën e Posaçme do të mbahet një seancë e hapur dëgjimore sipas padisë së një personi privat ndaj Agjencisë Kosovare të Privatizimit, në emër të ndërmarrjes “Trepça”.
Lëndë trajtimi, sipas këtij njoftimi, do të jetë kompensimi monetar i dëmeve materiale dhe për dhimbje dhe vuajtje të shkaktuara nga aksidenti në minierë, me pasoja të rënda trupore, lëndim krahu të punëtorit, transmeton Koha.net.
Tema ligjore:
• Obligimi i AKP-së të përfaqësohet me një avokat në procedurat pranë DHPGJS
• Baza ligjore dhe shuma për kompensimin e dhimbjes dhe vuajtjes në kontratat e punës.
Kjo seancë dëgjimore do të mbahet më 25 maj, në orën 10 në Pallatin Drejtësisë, ndërtesa D, zyra D nr. 28, saktësohet në njoftim.
Paneli gjyqësor do të përbëhet vetëm nga gjyqtari i EULEX-it, Werner K. Kannenberg. /Telegrafi/