Aeroplani “Airbus A320” i aviokompanisë “Air Canada” për shkak të një gabimi për pak sa nuk kishte aterruar në pistën e aeroportit të San Franciskos në Kaliforni, kurse tani është publikuar videoja ku shihet se për pak sa nuk është shkaktuar aksidenti më i tmerrshëm.
Siç raporton CNN, aeroplani për pak sa nuk është përplasur me aeroplanët tjerë që po prisnin në pistë, kurse aksidenti është parandaluar në sekondat e fundit kur kontrollorët e kullës i kërkuan pilotit që të mos aterrojë, transmeton Telegrafi.
Videoja në të cilin shihet momenti rrëqethës është publikuar nga Komisioni për Siguri të Trafikut Ajror. Hetimet e këtij incidenti janë duke vazhduar, kurse disa ekspertë pretendojnë se do të ishte një prej katastrofave më të mëdha në histori.
“Airbus A320” është dashur të aterrojë në pistën 28L, megjithatë ai gabimisht kishte tentuar të zbres në pistën C, në të cilën në ato momente gjendeshin katër aeroplanë tjerë që prisnin lejen për t’u ngritur në ajër.
Komisioni për Siguri të Trafikut Ajror, ka njoftuar se aeroplani i aviokompanisë “Air Canada” kishte fluturuar mbi aeroplanin “Boeing 787” të aviokompanisë “United Airlines”, derisa piloti i aeroplanit të “Air Canada” pa e ditur se çfarë po ndodhte, në një moment ka fluturuar vetëm 18 metra mbi tokë, duke rrezikuar të përfundonte mbi aeroplanët e ndalur.
Duke parë se diçka nuk është në rregull, aeroplani që ishte në pistë “Airbus A340” i aviokompanisë së Filipipneve, kishte ndezur dritat për të pasur dukshmërinë më të mirë.
Në dokumentet e hetimeve të realizuara thuhet se piloti i aeroplanit të “Air Canada”, kishte njoftuar Këshillin për Siguri të Trafikut Ajror se pas marrjes së lejes për aterrim, kishte parë disa drita në pistë që kishin krijuar konfuzion. /Telegrafi/
