Nga: Argyris Chionis
Përktheu: Romeo Çollaku
Oh, po, e kam marrë vesh mirë se mund të mbytesh edhe pa hipur në anije ndonjëherë, se mund të fundosesh përgjithmonë edhe pa lundruar kurrë në oqean.
Sa e sa njerëz u mbytën brenda kostumit, sa e sa në kolltukun e thellë, sa e sa i mbuloi në jetë të jetëve jorgani me pupla.
Dhe kushedi se sa të tjerë do jenë mbytur në supën e vakët, në një filxhan kafe, në një lugë gliko …
U qoftë i ëmbël gjumi ku dremisin thellë, u qoftë i ëmbël dhe pa ëndrra.
E lehtë u qoftë shtëpia që i mbulon.