Presidenti i Rusisë, Vladimir Putin ka premtuar se do të vazhdojë ta përkrahë integritetin territorial të Serbisë, përfshirë edhe pretendimet e saj ndaj, siç e ka quajtur, rajonin e kontestuar të Kosovës.
“Putin e ka thënë qartë se Serbia mund të llogarisë në Rusinë çdo kund ku Serbia e mbron integritetin territorial dhe pavarësinë e saj, veçanërisht në Kosovë”, ka thënë presidenti i Serbisë, Tomislav Nikolliq, pas takimit të 10 marsit, me Putinin në Moskë.
Serbia, e cila ka marrëdhënie të gjata e të afërta me Rusinë, mbështetet te përkrahja e Moskës në luftën e saj diplomatike që ta parandalojë Kosovën që të bëhet pjesë e Organizatës së Kombeve të Bashkuara.
Putini dhe Nikolliqi gjithashtu diskutuan marrëveshjen e fundit të Serbisë për ta lejuar personelin e NATO-s që të qëndrojë në këtë vend.
Nikolliqi tha se kjo marrëveshje është kryesisht për t’iu mundësuar trupave që t’i shkatërrojnë rezervat e armëve. Ai tha se Rusia nuk është e alarmuar nga kjo marrëveshje dhe se ‘Putini ka thënë se e kupton se çfarë kemi nënshkruar”.
Vizita e Nikolliqit vjen në kohën kur kryeministri serb, Aleksandar Vuçiq po kërkon reforma, të cilat do ta çonin vendin drejt rrugës për t’iu bashkuar BE-së.
Nikolliq është lider që haptas anon nga Rusia dhe shpesh flet kundër lidhjeve të ngushta me NATO-n dhe Bashkimin Evropian. /Rel/