Moska ka vendosur të dërgojë hetues në Turqi pasi një polic qëlloi për vdekje ambasadorin rus në Ankara.
Mevlut Mert Aydintas qëlloi ambasadorin Andrei Karlov teksa po mbante një fjalim të hënën, mesa duket në shenjë proteste ndaj ndërhyrjes së Rusisë në Alepo.
Nuk është e qartë nëse 22-vjeçari, që u qëllua për vdekje më vonë, ka lidhje me ndonjë grup.
Sipas BBC, presidenti turk, Recep Tayyip Erdogan tha se sulmi synon të dëmtojë marrëdhëniet me Rusinë.
Ai vjen një ditë pas protestave në Turqi në lidhje me mbështetjen që po i jep Rusia presidentit sirian, Bashar al-Assad.
Erdogan foli me presidentin rus, Vladimir Putin në telefon dhe të dy ranë dakord që ky ishte një ‘provokim’.
Ai tha se ata që duan të dëmtojnë marrëdhëniet mes dy vendeve, nuk do ia dalin.
Sulmi është dënuar nga shumë shtete, përcjell mapo.al.
Edhe kleriku Fethullah Gulen ka dënuar sulmin, duke theksuar se nuk ka asnjë lidhje me atentatorin.
Megjithatë teoritë konspirative kanë vërshuar në rrjetet sociale.
Disa politikanë rusë fajësojnë Perëndimin për krimin.
Sipas tyre, ata po i fryjnë shumë urrejtjes ndaj Rusisë për ndërhyrjen në Alepo.
Pasi e qëlloi ambasadorin tetë herë, polici turk thirri: “Zoti është më i madhi. Mos harroni Alepon, mos harroni Sirinë”.