Sofja është ndër qendrat më të rëndësishme diplomatike. Kështu tha në një intervistë për “NOVA”-n bullgare, ambasadorja e RMV-së në Sofje Angeza Rusi Popovska. Ajo shton se Maqedonia është kandidatja më e vjetër për anëtarësim në Bashkimin Europian nga Ballkani Perëndimor.
Rusi-Popovska beson se dy vendet mund të jenë më afër duke ndërtuar me mençuri një atmosferë të dialogut dhe respektit të ndërsjellë. Ajo shton se kjo është e vetmja mënyrë për të hapur një paradigmë të re në marrëdhëniet maqedono-bullgare.
“Në kohën e pavarësisë, brezi im po maturohej. Dhe mbaj mend që atëherë ëndërronim, kishim synim të bëheshim pjesë e familjes europiane dhe euroatlantike, të ndërtonim një shtet multietnik të drejtë dhe gjithëpërfshirës, me institucione demokratike, me shtet ligjor, me respekt për të drejtat e njeriut, ku të gjithëve do t’i garantohet e drejta për drejtësi, stabilitet, siguri dhe përparim. Dhe ne e shohim procesin e anëtarësimit në Bashkimin Europian pikërisht në këtë kuptim.
Përkundër të gjitha sfidave, integrimi europian nuk ka alternativë për Maqedoninë e Veriut, ashtu siç nuk ka alternativë për ndërtimin e miqësisë, fqinjësisë së mirë dhe bashkëpunimit mes Maqedonisë së Veriut dhe Bullgarisë, dhe unë e besoj thellë këtë.”- tha Agneza Rusi Popovska, ambasadore e RMV-së në Bullgari.