Shumë ndeshje dhe shumë interesa në mes. Prej kohësh disa prej emrave më të njohur të futbollit botëror kundërshtojnë trendin që po shtrydh futbollistët.
Kampionatet duhen rishikuar pasi nevojiten formula me më pak skuadra dhe në këtë mënyrë do të rritej niveli teknik dhe do të ulej ndjeshëm numri i dëmtimeve.
Kjo është rruga që propozojnë njerëzit kundër numrit të madh të ndeshjeve, mes të cilëve është edhe drejtuesi i lartë i Bayern Munichut, Karl Heinz Rummenigge, sipas të cilit, vendimi për ta zgjeruar në 24 numrin e skuadrave në Evropian, nuk ishte i menduar mirë. Sipas administratorit të deleguar të skuadrës bavareze, prej kohësh nuk po respektohen mendimet e lojtarëve.
“Zgjedhjet e bëra kanë rritur ndjeshëm numrin e ndeshjeve, çka do të thotë më shumë impenjime për lojtarët. Ne si klub nuk do ta pranojmë më që turnetë të fryhen edhe më shumë sepse kjo nuk është e mirë për atletët. Ndeshjet e kombëtareve janë rritur në mënyrë dramatike dhe kjo duhet të korrigjohet”.
Rummenigge shkon edhe më tej duke sqaruar se protesta e tij nuk do të ndalet thjesht te fjalët.
“Pas pak ditësh do të takohem me Federatën Ndërkombëtare të Futbollistëve Profesionistë dhe do të hartojmë një plan proteste. Do të ndërmarrim një iniciativë që nuk do t’i pëlqejë aspak FIFA-s dhe UEFA-s. Gjithashtu në mes është edhe problemi i sponsorizimeve. Rivali jonë më i madh nuk është Borussia Dortmund, por Kombëtarja e Gjermanisë dhe po ju jap një shembull. Ne kemi një kontratë me kompaninë Audi por gjatë europianit, federata i detyroi lojtarët tanë të reklamonin markën Mercedes. Gjëra të tilla nuk janë të pranueshme”.
Gjithsesi, pavarësisht problemeve, Bayerni i Mynihut nuk do t’i pengojë asnjëherë lojtarët për të përfaqësuar kombëtaren.
“Do të ishte e gabuar. Unë personalisht kam luajtur 95 ndeshje me Gjermaninë dhe e di shumë mirë vlerën që kanë kombëtaret. Kjo vlerë nuk duhet të ridimensionohet nga askush por federatat nuk kontribuojnë asnjëherë në pagesat e lojtarëve”.