Pas njoftimit të rezultateve përfundimtare jozyrtare të zgjedhjeve të parakohshme të mbajtura më 15 korrik, rrjedhin afatet për ankimime dhe kundërshtime për procesin zgjedhore dhe për rezultatet.
Çdo parashtrues i listës së kandidatëve në procedurën e votimit, përmbledhje dhe përcaktim i rezultateve të votimit mund të paraqesë ankesë pranë KSHZ-së brenda 48 orëve pas përfundimit të votimit, gjegjësisht publikimit të rezultateve fillestare. KSHZ-ja është e detyruar të zgjidhë ankesën brenda 48 orëve pas pranimit, përcjell Telegrafi Maqedoni.
Ankesa kundër vendimit të KSHZ-së mund të paraqiten në Gjykatën Administrative, në afat prej 24 orëve nga marrja e vendimit. Gjykata Administrative nga ana tjetër pas ankesës, është e detyruar të marrë vendim brenda 48 orëve nga marrja e saj.
Çdo votues, e drejta e votimit e të cilit është shkelur në procedurën e votimit, mund të paraqesë ankesë pranë KSHZ-së në afat prej 24 orëve. KSHZ-ja është e detyruar të marrë vendim brenda katër orësh pas pranimit.
Çdo votues mund të apelojë kundër vendimit të KSHZ-së brenda 24 orëve pas pranimit në Gjykatën Administrative të Republikës së Maqedonisë së Veriut, e cila, pas ankesës, është e detyruar të marrë vendim brenda 48 orëve nga marrja e saj.
KSHZ-ja, me detyrë zyrtare ose pas ankesës së marrë, mund të anulojë votimin në vendvotimin me një vendim në raste të caktuara të përcaktuara me Kodin Zgjedhor./Telegrafi/