Rimëkëmbja ekonomike në Eurozonë ka qëndruar e zymtë në tremujorin e fundit të 2015-ës, pasi shifrat zyrtare treguan për një rritje me 0.3 për qind për të dytin tremujor radhazi.
Zgjerimi me 0.3 për qind tregon se ekonomia e bllokut të monedhës së përbashkët është 1.5 për qind më lartë krahasuar me të njëjtën periudhë të një viti më parë. Sipas shifrave, pjesë të rajonit kanë shfaqur të dhëna të dobëta, ndërsa ekonomia e Greqisë ka rënë në recesion, duke shënuar dy tremujor radhazi në tkurrje. Ekonomia e Greqisë u tkurr me 0.6 për qind, krahasuar me 1.4 për qind rënie në tremujorin e tretë.
Ndërkohë, Produkti i Brendshëm Bruto i Italisë u rrit me vetëm 0.1 për qind gjatë tremujorit të katërt, duke shtuar kështu shqetësime se rikthimi në rritje që filloi gjatë vitit të kaluar, pas 3 viteve në recesion, mund të jetë zbehur.
Të dhënat e dobëta të ekonomisë së tretë më të madhe në Eurozonë përbëjnë një disfatë për qeverinë e udhëhequr nga Matteo Renzi, pasi do ta bëjë më të vështirë për kryeministrin që të arrijë objektivat fiskale dhe mund të komplikojë bisedimet për buxhetin me BE.
Italia i ka kërkuar Brukselit t’i lejojë më shumë fleksibilitet në deficitin buxhetor për shkak të përpjekjeve në reforma, planit të investimeve dhe kostot e lidhura me emigrantët e sigurinë. Por vendi ka premtuar që raporti i borxhit me Produktin e Brendshëm Bruto do të nisë rënien në 2016-ën për të parën herë në 8 vite. Por, kjo bëhet më e vështirë nëse rimëkëmbja e ekonomisë qëndron e dobët. /Telegrafi/