Në vitin 2014 ka pasur rënie drastike të investimeve të huaja, të investimeve publike dhe thellim të deficitit tregtar. Të gjitha këto kanë ndikuar që rritja ekonomike të jetë më e ulët se ajo që ishte planifikuar në fillim të vitit. Rritja ekonomike prej 3 për qind është arritur falë rritjes së konsumit.
Rritja e kredive konsumuese gjatë vitit 2014 ka qenë një nga faktorët që ka pasur ndikimin më të madh në rritjen ekonomike të vitit 2014. Në rritjen e konsumit kanë ndikuar edhe rritja e pagave që kishte ndodhur para zgjedhjeve të 8 qershorit, si dhe rritja e dërgesave nga jashtë – remitencat, shkruan Koha Ditore.
Ky është përshkrimi i performancës makroekonomike për vitit 2014, që i ka bërë Banka Qendrore e Kosovës. “Investimet publike në vitin 2014 kanë shënuar rënie prej 22.3 për qind, ndërkohë që edhe investimet e huaja direkte (IHD) deri në shtator kanë shënuar rënie për 44.7 për qind”, thuhet në raportin e BQK-së për vlerësim tremujor të ekonomisë, për tremujorin e fundit të vitit 2014.
Në raportin e BQK-së thuhet se rritja e kreditimit ka qenë njëri nga faktorët që kanë ndikuar në rritjen e konsumit, përkatësisht në rritjen ekonomike. /Telegrafi/