Agjencia e Statistikave të Kosovës (ASK) ka publikuar “Statistikat e Transportit dhe Telekomunikimit” për TM22018, me të dhëna mbi Transportin Ajror, Hekurudhor, Rrugor, dhe Telekomunikimin.
Në territorin e Kosovës janë gjithsej 333 km binarë hekurudhorë për transport. Në hekurudhat e Kosovës qarkullojnë 9 lokomotiva, prej tyre shtatë disel dhe dy trena motorikë. Lokomotivat bartin dhjetë vagonë për udhëtarë dhe 1420 vagonë për mallra.
“Në tremujorin e dytë të vitit 2018, numri i pasagjerëve që kanë shfrytëzuar trenin si mjet udhëtimi është 37 mijë, ku krahasuar me tremujorin e njëjte të viti të kaluar (TM2 2017) numri i udhëtareve është zvogëluar për 34.90%”, ka njoftuar ASK, shkruan Telegrafi.
Transporti i mallrave me tren në tremujorin e dytë të vitit 2018 është 96 mijë tonë, kukrahasuar me periudhën e njëjte të viti të kaluar (TM2 2017) ka ulje për 27.27%.
Kurse, sa i përket numrit të fluturimeve në tremujorin e dytë të vitit 2018 ka pasur 1957 fluturime ose 10.75% më shumë se në tremujorin e njëjtë të vitit të kaluar (TM22017).
“Numri i udhëtarëve që kanë shfrytëzuar aeroplanin si mjet transporti gjatë këtij tremujori është rreth 524 mijë, ku krahasuar me tremujorin e njëjtë të vitit të kaluar (TM2 2017) ka rritje për 12.67%”, tregon ASK-ja.
Bazuar në kërkesën e Eurostat-it, duke filluar nga ky tremujor (TM2 2018), publikimi ka pësuar disa ndryshime në pjesën e telekomunikimit, duke përfshire të dhëna edhe nga operatorë të tjerë, në mënyre që të mbulohen të gjitha shërbimet e telekomunikimit të ofruara në vend. /Telegrafi/