Vendimi përcakton që përmes licencimit, në të ardhmen do të zëvendësohet sistemi linear i pagave në arsim. Sistemi i ri i pagave do të shënojë dallime pozitive në të ardhurat e mësimdhënësve, drejtorëve, zëvendësdrejtorëve dhe bashkëpunëtorëve profesional në nivelin fillorë dhe të mesëm të arsimit në Kosovë.
Vendimi përcakton se mësimdhënësit me përgatitjen profesionale të nivelit të Shkollës Normale, përfitojnë një ngritje prej 10 deri në 22 për qind, ata me përgatitje të Shkollës së Lartë Pedagogjike rritje të pagës bazë prej 19 deri në 31 për qind, mësimdhënësit me përgatitje universitare 3 dhe 4 vjeçare përfitojnë ngritje prej 27 deri në 39 për qind, ndërsa mësimdhënësit me përgatitje pasuniversitare (magjistraturë ose doktoraturë) do të përfitojnë ngritje nga 35 deri në 47 për qind.
Kryeministri Hashim Thaçi ka vlerësuar se me angazhimin e deritashëm, Qeveria e Republikës së Kosovës ka dëshmuar se prioritet i saj është arsimi dhe edukimi i brezave të rinj në Kosovë.
Thaçi ka theksuar se duke investuar në arsim, ne investojmë në të ardhmen tonë. “Qeveria ka dëshmuar përkushtimin e saj ndaj arsimit përmes investimeve në objekte të reja shkollore, përmes licencimit dhe akreditimit të institucioneve arsimore, pilot projekteve për kompjuterizimin e shkollave, përmes ndarjes falas të librave shkollorë, njohjes së përvojës së punës për arsimtarët, ndërsa finalizim i këtij përkushtimi është vendimi i sotëm për të rritur pagat e mësimdhënësve, që do të përmirësojë pozitën materiale të mësimdhënësve në Kosovë”, është shprehur kryeministri Hashim Thaçi.
Ministri i Arsimit, Shkencës dhe Teknologjisë, Enver Hoxhaj ka theksuar me këtë rast se vizioni i Qeverisë së Republikës së Kosovës është orientuar në investimin për të përmirësuar infrastrukturën e hapësirave dhe objekteve shkollore, përmirësimin e bazës materiale të mësimdhënësve dhe në sigurimin e teksteve shkollore. Kjo do të sigurojë ngritjen cilësore të arsimit dhe edukimit të brezave të rinj në Kosovë, ka thënë ministri Hoxhaj. /Telegrafi/