Rriten polemikat, Carragher pranon se rivënia anësore në golin e fitores së Liverpoolit duhej të ishte për Tottenhamin

Nuk kanë munguar polemikat në fitoren e Liverpoolit ndaj Tottenham Hotspurit që u vendos me një gol të shënuar nga Roberto Firmino.

Mirëpo, nuk kanë munguar situatat kundërthënëse për golin e realizuar, ndërkohë që trajneri i Spursave, Jose Mourinho, kishte deklaruar pas ndeshjes se është habitur me sistemin VAR pse nuk ndërhyri ta anulonte golin.

Lexo po ashtu Liverpooli triumfon edhe në udhëtim te Tottenhami, Reds janë gati për derbin me Unitedin

Topi në aksionin e golit u nis nga një rivënie anësore për Liverpoolin, ndërsa xhirimet treguan se në fakt kishte qenë Sadio Mane lojtari që e ka bërë prekjen finale, para se topi ta kalonte vijën. Që do të thotë se ishte rivënie anësore për Tottenhamin dhe jo për Redsat.

Në një prononcim për Sky Sports, legjenda e ‘Të Kuqve’, Jamie Carragher, ka pranuar se rivënia anësore duhej të ishte e Spursave.

“Jo, duhej të ishte rivënie anësore për Tottenhamin, por anësori është në anën tjetër të fushës, gjyqtari është prapa, gjithmonë është vështirë për t’u vendosur”, ka deklaruar Carragher.

Nga sistemi VAR u kontrollua për prekje të topit me dorë nga Jordan Henderson në ndërtimin e aksionit dhe u vendos se gjithçka ishte në rregull, porse Mourinho e kishte përmendur faktin që rivënia anësore ishte e Tottenhamit. /Telegrafi/