Rrëzimi i aeroplanit që shkaktoi vdekjen e 71 njerëzve, duke përfshirë shumicën e ekipit të Chapecoenses, është shkaktuar nga një gabim njerëzor – kanë bërë të ditur autoritetet kolumbiane të aviacionit.
Aeroplani që operohej nga kompania me bazë në Bolivi, LaMia, u rrëzua në malet në afërsi të Medellinit, sepse piloti kishte dështuar që ta rimbushte me karburant. Ai po ashtu nuk i ka raportuar dështimet e motorit të shkaktuar nga mungesa e karburantit, derisa ishte tepër vonë – kanë njoftuar zyrtarët.
Sekretari për Siguri Ajrore në Bolivi, koloneli Freddy Bonilla, ka thënë se asnjë faktor teknik nuk ka qenë shkaktar i aksidentit, si dhe gjithçka përfshin gabimin njerëzor. Ai ka shtuar se, përveç mungesës së karburantit, aeroplani ishte mbi vlerën e lejuar të ngarkesës për afro 400 kilogramë dhe nuk ishte i certifikuar për të fluturuar në lartësinë që ishte para se të rrëzohej.
Ka pasur spekulime nga më të ndryshmet rreth rrëzimit të aeroplanit, ndër të cilat se pasagjerët janë vrarë. Duhet theksuar se piloti Miguel Quiroga ishte njëherësh bashkëpronar i kompanisë ajrore, ndërsa ka vdekur në aksident.
Shefi ekzekutiv i LaMia, Gustavo Vargas Gamboa, është në burg me akuzat për vrasje dhe padi të tjera, të cilat i ka mohuar. Djali i tij, Gustavo Vargas Villegas, po ashtu po mbahet për keqpërdorim të ndikimit të tij për marrjen e licencës për aeroplanin që u rrëzua.
Ndryshe, aeroplani po i dërgonte lojtarët e ekipit brazilian, Chapecoense, drejt ndeshjes së tyre më të madhe në histori – finalen e Copa Sudamericana. Rrëzimit i mbijetuan vetëm tre lojtarë, dy anëtarë të stafit dhe një gazetar. /Telegrafi/
