Aktivistët e Nismës Rinore për të Drejtat e Njeriut (YIHR) kanë vendosë tabela në fshatin Hrtkovci të Vojvodinës për t’i kujtuar krimet kundër njerëzimit për të cilat u dënua lideri i Partisë Radikale Serbe dhe kandidati i sivjetshëm për deputet në Serbi, Vojisllav Sheshel.
Tabelat në anë të rrugës ishin vendosur pranë shtëpisë së Sheshelit, të cilën ai e bleu në vitin 2018 pasi u dënua nga Gjykata e Hagës, shkruan Evropa e Lirë, seksioni në gjuhën serbe.
Në vitin 2018, Sheshel u dënua me dhjetë vjet burg nga Tribunali i Hagës për nxitje të persekutimit, dëbimit dhe zhvendosjes së detyruar të kroatëve.
Ai ishte i ndaluar në Scheveningen që nga viti 2003 dhe u lirua në nëntor 2014 për shkak të përkeqësimit të shëndetit të tij. Koha e kaluar në paraburgim ishte përfshirë në dënimin e tij dhe ai nuk u kthye në gjykatë për dënimin.
Pavarësisht vendimit të Gjykatës së Hagës, Shesheli ishte anëtar i parlamentit nga viti 2016 deri në vitin 2020, kur radikalët e tij nuk e kaluan pragun zgjedhor.
Partia Radikale Serbe do të shkojë në zgjedhjet e Beogradit dhe ato lokale më 17 dhjetor me Partinë Progresive Serbe në pushtet, lider i së cilës deri vonë ishte presidenti i Serbisë, Aleksandar Vuçiq.
Aktivistët e YIHR theksojnë se të gjithë akterët politikë në fushatën zgjedhore kanë për obligim të veprojnë me dinjitet dhe të përmbahen nga deklaratat që fyejnë viktimat e çdo kombësie.
Në raportin e Komisioneres për të Drejtat e Njeriut të Këshillit të Evropës, Dunja Mijatoviq, i cili u publikua më 23 nëntor, shkruhet se mijëra të dyshuar për krime lufte në vendet e ish-Jugosllavisë ende nuk janë ndjekur penalisht.