Kevin-Prince Boateng ka rrëfyer një ngjarje shumë interesante që i kishte ndodhur pas ‘Kampionatit Botëror 2010’ në Afrikën e Jugut.
Mesfushori që ka lindur në Gjermani, vendosi ta përfaqësonte vendin e origjinës në nivele të larta dhe me Ganën e tij luajti në gjysmëfinale të turneut më të madh botëror të futbollit.
Asokohe ekipi i Ganës u takua me ish presidentin afrikan, Nelson Mandela, diçka që për futbollistin ishte një realizim ëndrre.
“Kanë qenë tre njerëz që gjithmonë kam dashur t’i takoj: Michael Jackson, Muhammad Ali dhe Nelson Mandela”, ka thënë Boateng në një intervistë për The Guardian.
“Arrita ta takoj vetëm njërin prej tyre dhe është vështirë për ta përshkruar (momentin e takimit). Ishte kënaqësi. Mandela qëndroi në burg për 27 vjet vetëm pse u ngrit për të drejtat e tij, ndërsa e shihja teksa qëndronte ulur dhe nuk kishte kurrfarë zemërimi brenda tij”.
“Ai duhet të jetë i zemëruar me gjithë botën, por nuk ishte. Ishte i qetë, qëndronte në karrigen e tij të vogël dhe i përshëndeste të gjithë. Të bënte të ndihesh i qetë. Shkëlqente. Sikur të ishte një film. Sikur po qëndronte një engjëll aty”, ka treguar Boateng, citon Telegrafi.
Futbollisti ka thënë më tej se ishte habitur kur kundërshtari i aparteidit, jo vetëm që e dinte se kush ishte ai, por i kishte thënë se vajza e tij ishte një fanse e madhe e Boateng.
“Hymë në dhomë: ‘Përshëndetje… përshëndetje… përshëndetje’. Ai ma shtrëngoi dorën dhe më tërhoqi në drejtim të tij dhe më tha: ‘Vajza ime do të martohet me ty’. I thashë: ‘Më vjen keq, por tashmë kam të dashur’”.
“Ai më tha: ‘Jo, jo, por kam (vajza) të tjera akoma më të bukura’. Të gjithë po qeshnin. Është për keqardhje se nuk mund të bënim fotografi, sepse blici ia dëmtonte sytë, prandaj e kam vetëm një fotografi me të. Ndërsa, aty nuk ngjaj si vetja”, ka theksuar Boateng. /Telegrafi/
