Kuvendi dhe Qeveria duhet të bëjnë gjithçka që munden për ta kthyer Maqedoninë në rrugën evropiane.
Ky është mesazhi i dërguar sot nga kryetari i Komisionit të Politikës së Jashtme të Bundestagut dhe ish-ministri gjerman i Shtetit për Evropën, Michael Roth, përcjell Telegrafi Maqedoni.
Roth thotë se rikthimi në binarë do të thotë se ndryshimet kushtetuese mund të jenë të dhimbshme, por në fund të fundit janë të nevojshme.
Para fillimit të konferencës “Përparimi i procesit të Berlinit përmes diplomacisë parlamentare”, Roth tha se është e nevojshme ambicie më e madhe për bisedimet e anëtarësimit.
“Dua të motivoj kolegët e mi këtu se ia vlen të angazhohemi më shumë në luftën kundër korrupsionit, për pavarësinë e gjyqësorit, për forcimin e shtetit ligjor dhe kulturës demokratike në këtë vend. Por reformat e nevojshme nuk janë vetëm përgjegjësi e Qeverisë, por edhe e deputetëve”, tha Roth.
Në pyetjen e gazetarëve për ndryshimet në kodin penal, Roth tha se tani nuk është koha për shantazhe të ndërsjella./Telegrafi/