Cristiano Ronaldo tashmë ndodhet në Torino, ku të dielën mbrëma ka darkuar me drejtorët e Juventusi dhe agjentin e tij, Jorge Mendes.
Për të shmangur grumbullimin e tifozëve dhe gazetarëve, superylli portugez ka udhëtuar drejt Aeroportit torinez Caselle me aeroplan privat.
Ai është shoqëruar nga nëna Maria Dolores, e dashura Georgina Rodriguez dhe djali i madh, Cristiano Jr.
Gjatë të hënës, 33-vjeçari do t’u nënshtrohet ekzaminimeve mjekësore në J-Centre të Juventusit.
Me Ronaldon kanë darkuar drejtori gjeneral i Juves, Giuseppe Marotta, drejtori sportiv, Fabio Paratici dhe zëvendëspresidenti Pavel Nedved.
Ka pasur thashetheme se CR7 i ka shikuar disa shtëpi luksoze në afërsi të parkut La Mandria, i cili është i rezervuar vetëm për banorët rezidentë.
Pas testeve mjekësore që do të mbahen mëngjesin e sotëm (e hënë), do të prezantohet në orën 18:30. /Telegrafi/