Manchester Unitedi ka konfirmuar se Cristiano Ronaldo nuk do të luajë në ndeshjen e fundjavës ndaj Chelseat, pas refuzimit të tij për t’u inkuadruar në lojë në fund të sfidës ndaj Tottenham Hotspur.
Superylli portugez ka dalë me deklaratë në formë reagimi pas lajmit se është përjashtuar nga udhëtimi i Djajve të Kuq në Old Trafford.
37-vjeçari u largua nga fusha në minutat e fundit të takimit duke shkuar drejt zhveshtores, ndërsa trajneri Erik ten Hag dhe klubi kanë vendosur ta dënojnë duke e lënë jashtë ekipit për sfidën ndaj Bluve.
“Ashtu siç kam bërë gjithmonë gjatë karrierës sime, përpiqem të jetoj dhe të luaj me respekt ndaj kolegëve, kundërshtarëve dhe trajnerëve të mi. Kjo nuk ka ndryshuar. Unë nuk kam ndryshuar. Unë jam i njëjti person dhe i njëjti profesionist që kam luajtur për 20 vitet e fundit duke luajtur futboll elitar dhe respekti ka luajtur gjithmonë një rol shumë të rëndësishëm në procesin tim të vendimmarrjes”.
“Fillova shumë i ri, shembujt e lojtarëve më të vjetër dhe më me përvojë ishin gjithmonë shumë të rëndësishëm për mua. Prandaj, më vonë, gjithmonë jam përpjekur të jap vet shembullin për të rinjtë që u rritën në të gjitha skuadrat që kam përfaqësuar. Fatkeqësisht, kjo nuk është gjithmonë e mundur dhe ndonjëherë nxehtësia e momentit merr më të mirën nga ne”.
“Tani për tani, thjesht ndjej se duhet të vazhdoj të punoj shumë në Carrington, të mbështes bashkëlojtarët e mi dhe të jem gati për gjithçka në çdo lojë të caktuar. Të dorëzohesh ndaj presionit nuk është një opsion. Nuk ka qenë kurrë. Ky është Manchester Unitedi dhe ne duhet të qëndrojmë të bashkuar. Së shpejti do të jemi sërish bashkë”, shkruan në deklaratën e Ronaldos.
Raportet e portugezit dhe trajnerit Ten Hag duket të jenë dëmtuar shumë dhe pas këtij veprimi të klubit, mund të jenë të pandreqshme. /Telegrafi/