Ronaldo ka folur për kohën e tij tek Interi, teksa ka zbuluar se ai kurrë nuk do të largohej nga Nerazzurrët, por u ndje i detyruar të largohej kur klubi mbështeti trajnerin Hector Cuper.
Fenomeni Ronaldo luajti për disa sezone te Interi për tu larguar më pas drejt Real Madridit, por ka treguar se asnjëherë nuk do të largohej me dëshirë.
“Ai Interi ishte një ekip fantastik. Së bashku me Bobo Vierin, ne kishim Clarence Seedorf dhe shumë talente të tjera. Fatkeqësisht, dëmtimet më penguan të ndaja fushën me Vierin shumë herë”, ka thënë fillimisht Ronaldo.
“Kur arrita për herë të parë, kishte një entuziazëm shumë të madh në Inter dhe tifozët besuan se mund të arrinim rezultate të mrekullueshme”.
“Unë shoh entuziazëm rreth Interit edhe këtë vit dhe shpresoj se mund të fitojmë diçka”.
“Asnjëherë nuk kam dashur të largohem nga Interi, pasi e ndjeja se ishte shtëpia ime dhe do të ishte për jetë”.
“Unë kurrë nuk do të shkoja te një president për të kërkuar që ata të largonin trajnerin, pasi nuk dukej kështu dhe nuk ishte stili im”, përfundoi fenomeni. /Telegrafi/