Juventusi ka vazhduar me shkëlqimin në kampionatin italian duke e fituar titullin e tetë radhazi, ndërkohë që në javën që shkoi u eliminua nga Liga e Kampionëve në fazën çerekfinale.
Cristiano Ronaldo, tek i cili ishin shpresat për trofeun e madh evropian, i është gëzuar sezonit të tij të parë te Zonja e Vjetër duke thënë se skuadra do të tentojë në edicionin e ardhshëm për ta fituar trofeun e shumëpritur.
“Sipas mendimit tim, ka qenë një sezon i parë shumë i mirë dhe jam përshtatur mirë. E fituam Scudetton dhe Superkupën e Italisë, gjë që nuk është lehtë të arrihet”.
“Ishte një vit suksesi. Jemi të gëzuar. Nuk mund të fitosh gjatë gjithë kohës. Kemi besuar se mund të bëjmë më shumë dhe kemi dashur të fitojmë, por vetëm një skuadër mund ta fitojë Ligën e Kampionëve”.
“Vit i tjetër është një faqe tjetër, tifozët e duan dhe ne e duam po ashtu. Është një trofe i rëndësishëm, por është vështirë ta arrish në këtë garë. Është një grup pozitiv dhe besoj se ka qenë një sezon i mirë”, ka deklaruar Ronaldo për Sky Sport Italia. /Telegrafi/