Kapiteni i Portugalisë, Cristiano Ronaldo, pas fitores në finale kundër Francës është shprehur se triumfi në ‘Euro 2016’ është një ëndërr e kamotshme që është bërë realitet.
Superylli i Real Madridit ishte detyruar që të largohej nga fusha në minutën e 25-të për shkak të një lëndimi që pësoi, transmeton Koha.net. Por, përkundër lëndimit ai mbështeti skuadrën e tij nga banka rezervë.
“Jam shumë i lumtur. Kjo është diçka që kam dëshiruar për një kohë të gjatë, që nga viti 2004. Populli portugez e meriton këtë, lojtarët e meritojnë këtë. Fatkeqësisht, gjërat nuk shkuan mirë për mua, por gjithmonë kam besuar në këta lojtarë. Ata kanë kualitet dhe aftësi”, ka thënë Ronaldo për Uefa.com.
Ai më tutje e ka përshkruar triumfin në ‘Euro 2016’ si një nga momentet më të mira në karrierën e tij.
“Ky është një nga momentet më të lumtura në karrierën time. Gjithmonë kam thënë se dua ta fitoj një trofe me ekipin kombëtar dhe të shkruaj historinë. Dua të falënderoj bashkëlojtarët, trajnerin, ekipin më të gjerë në këtë Evropian dhe popullin e Portugalisë që gëzohen me ne. Ky është një moment unik për mua, është e paharrueshme”, ka shtuar ai.