Ambasadori i Gjermanisë në Kosovës, Jorn Rohde, ka thënë se Kosova duhet ta përgatitë draftin e statutit të Asociacionit të komunave me shumicë serbe.
Rohde këto deklarata i bëri pas takimit që ka zhvilluar me anëtarët e Komisionin parlamentar për punë të jashtme dhe diasporë.
“Versioni më i mirë, drafti më i mirë për Kosovën, mund të hartohet nga vetë Kosova. Mirëpo një version nuk është një draft, kështu që na duhet një draft nga Kosova së shpejti që ta shohim se çfarë ide konkrete ka për Asociacionin. Ky është obligimi i Kosovës që ta përshpejtojë procesin”, ka thënë Rhode.
Ndryshe, gjatë takimit, të 2 majit një ekip menaxhues, i përbërë prej katër pjesëtarëve të komunitetit serb, kishte prezantuar draft-statutin për formimin e Asociacionit, por që ishte kundërshtuar nga kryeministri Albin Kurti.
Sipas Kurtit, ekziston dëshira për një Republikë Srpska në Kosovë dhe kjo dëshirë e ka shkruar këtë statut, duke theksuar se dokumenti, si i tillë është fundamentalisht i papajtueshëm me kushtetutshmërinë e Kosovës. /Telegrafi/