Erzin do të jetë në pozitën e re prej datës 1 shkurt të këtij viti. Para se të vijë në pozitën e drejtorit ekzekutiv në IPKO, Erzin ka mbajtur pozita të rëndësishme ekzekutive në Telekom Slovenije për më shumë se 17 vjet, ku së fundmi ai ka shërbyer si këshilltar i Kryetarit të Bordit Menaxhues, dhe njëkohësisht si kryesues i Bordit të Drejtorëve në Primo Communications në Shqipëri.
Robert Erzin tha se marrja e pozitës së drejtorit ekzekutiv të kompanisë IPKO, është një sfidë e madhe për tw. “Kjo kompani punëson njerëz të rinj dhe shumë të talentuar, dhe unë besoj që së bashku ne do të arrijmë rekorde të reja”, theksoi Erzin, pas emërimit të tij në pozitën e drejtorit ekzekutiv në IPKO.
Karriera profesionale e Robert Erzin me telekomin slloven ka filluar prej vitit 1994, ku ai fillimisht ka punuar si drejtues i zhvillimit të rrjetit dhe transmisionit, për të vazhduar më pas si drejtor i marketingut, hulumtimit të tregut, politikës së çmimeve si dhe zhvillimit të shërbimeve, për më shumë se katër vjet.
Më pas, Erzin ka marrë pozitën e drejtorit të zhvillimit të shërbimeve, për të kaluar 3 vjet më vonë në pozitën e drejtorit të politikave të çmimeve dhe rregullatorit, dhe pas kësaj në pozitën e drejtorit të departamentit të kontrollit, rrjetit dhe infrastrukturës.
Erzin ka përfunduar Fakultetin Ekonomik dhe programin e biznesit në IMD, si dhe Fakultetin dhe magjistraturën e Inxhinierisë Elektrike dhe Kompjuterike në Universitetin e Lubjanës. Ai flet rrjedhshëm edhe katër gjuhë të huaja. /Telegrafi/