Gjykata themelore e Ohrit e ka shfuqizuar paraburgimin për Bojan Ugrenoviq (30), nga Kraljeva e Serbisë, i akuzuar për mbytjen e Dimitar Matillovski (27), përcjell Telegrafi Maqedoni.
Rasti ka ndodhur në natën e vitit të ri në Ohër, më 2016. Procesi gjyqësor nuk ka përfunduar ende, kurse akuza për veprën penale ndaj Ugrenoviq parasheh burg prej më së paku pesë viteve.
Megjithatë, Gjykata ka caktuar masa kujdesi për të akuzuarin, pra të mos e lëshojë territorin e Maqedonisë, i është marrë dokumentacioni i udhëtimit dhe se duhet të paraqitet para organeve përgjegjëse.
Deri te ky zhvillim ka ardhur pasi që Gjykata e Apelit në Manastir, e ka shfuqizuar vendimin e Gjykatës themelore të Ohrit, për dënim prej 16 viteve për shtetasin serb.
Në seancën e 25 korrikut, Ugrenoviq ndërroi deklaratën e tij të mëparshme, kur e pranoi fajësinë dhe shprehu keqardhjen e thellë. Tani ai është shprehur se është i pafajshëm. Procesi gjyqësorë do të vazhdojë në shtator./Telegrafi/