Zëvendëskryeministrja në kabinetin e Qeverisë Kurti 2, Emilija Rexhepi, thotë se ka kaluar koha e krijimit të “Serbisë së madhe” ose “Shqipërisë së Madhe”.
Rexhepi, në një intervistë për gazetën boshnjake “Dnevni Avaz”, ka folur edhe lidhur me rolin udhëheqës të opsionit pro-rus në udhëheqjen e Malit të Zi dhe përpjekjet e presidentit serb Aleksandar Vuçiq ta bëjë Serbinë shtet udhëheqës rajonal.
“Ka kaluar koha e krijimit të ‘Serbisë së Madhe’, ose tani ‘Shqipërisë së Madhe’. Të gjithë popujt e Ballkanit duhet ta kuptojnë se koha e nacionalizmit, mbi të gjitha favorizimit shovinist të një kombi si superior, ishte e gabuar dhe nuk i solli askujt asgjë të mirë. Pra, le të respektojmë njëri-tjetrin, të respektojmë vlerat e diversitetit. Sigurisht, e kaluara e vështirë nuk mund të harrohet kurrë, por është detyrimi ynë prindëror dhe qytetar që t’i rrisim fëmijët tanë në frymën e tolerancës”, Rexhepi, përcjell Telegrafi.
Lidhur me prioritetet e saj zëvendëse e kryeministrit Kurti, ajo shprehet se “është një nder dhe privilegj i madh të jesh zëvendëskryeministre, por edhe një përgjegjësi dhe detyrim i madh që kam marrë përsipër, të dëgjohet zëri i të gjithë popujve në Kosovë, dhe të jetë i barabartë dhe i respektuar ashtu siç e thotë Kushtetuta”.
Rexhepi ka folur për të ardhmen e marrëveshjes së nënshkruar në Uashington vitin e kaluar nga kryeministri i Kosovës, Avdullah Hoti dhe presidenti serb Aleksandar Vuçiq, ndaj të ciles Albin Kurti ishte shumë kritik.
“Qeveria Kurti u rrëzua në një mënyrë shumë të ulët dhe tinëzare, gjatë pandemisë, ku nuk mund t’u kundërviheshim të gjitha forcave të brendshme dhe të jashtme. Por, jam 100 për qind i sigurt, para së gjithash, në qëndrimin tim, por edhe në qëndrimin e Albin Kurtit, se kurrë nuk kemi qenë dhe nuk jemi kundër popullit amerikan, Qeverisë ose Ambasadës Amerikane – këtë e them me përgjegjësi”, tha ajo.
“Qeveria jonë e re ka një detyrim të madh ndaj qytetarëve. Ne së pari do të përqendrohemi në sistemin e kujdesit shëndetësor, reformat në gjyqësor dhe arsim, por, natyrisht, dialogu me Serbinë dhe normalizimi i marrëdhënieve duhet të vazhdojë, por unë e di me siguri që me Kurtin ky proces do të jetë shumë më i përgjegjshëm institucionalisht sesa ka qenë deri më tani”, tha Rexhepi. /Telegrafi/