Drita ka arritur një fitore tejet të vlefshme përballë Vllaznisë së Pozhoranit që e ka mposhtur me rezultat të pastër 3-0.
Ndeshja nisi kujdesshëm nga të dyja skuadrat të cilat e respektonin njëra tjetrën në fushë.
Loja më shumë luhej në mesin e fushës pa ndonjë rast të mirë shënimi.
Astrit Fazliu dhe Përparim Livoreka kishin raste të mira shënimi për Dritën në pjesën e parë por që nuk ia dolën të shënojnë.
Edhe mbrojtësi Liridon Leci provoi pesë minuta para fundit të pjesës së parë me kokë por pa sukses.
Me rezultatin e bardhë 0-0 përfunduan 45 minutat e para të kësaj sfide.
Me të filluar pjesa e dytë Drita u tregua e saktë para portës për të kaluar në epërsi 1-0.
Ishte sulmuesi qendror i Dritës, Kastriot Rexha që shënoi në minutën e 50-të për epërsinë e vendasve.
Vllaznia pati rast të mirë shënimi pesë minuta më vonë, por talenti i tyre Festim Alidema nuk shënoi edhe pse goditi bukur.
Goli i dytë për Dritën erdhi 10 minuta para fundit të ndeshjes me autor përsëri Kastriot Rexhën.
Vetëm pesë minuta më vonë, Rexha kompletoi het-trikun e tij duke shënuar një gol të bukur në portën e pozhoranasve.
Pas kësaj fitore, Drita ngjitët në pozitën e dytë me 29 pikë të tubuara, ndërsa Vllaznia mbetet në vendin e fundit me vetëm pesë pikë pas 17 ndeshjeve.
Në ndeshjen e ardhshme, Drita do ta luaj derbin e qytetit ku do të përballet me Gjilanin.
Ndërkohë Vllaznia e Pozhoranit do të kërkojë rezultat pozitiv kundër Flamurtarit të Prishtinës. /Telegrafi/