Ekonomia Shqiptare është e vetmja që ka pësuar rritje në kohë krize dhe ka tërhequr një fluks të qëndrueshëm investimesh të huaja.
Vendet e tjera ballkanike ndërkaq janë akoma të kapluara nga kriza dhe kapërcimin e parë nga zeroja do ta kenë në vitin 2010 tha profesori boshnjak Zlatko Lagumdzija. Studimi në fjalë përfshin edhe Kosovën, që pritet të ketë rritje ekonomike këtë vit.
Studimi ka përmbledhur parashikimet ekonomike të agjencive ndërkombëtare financiare që thonë se GDP e Shqipërisë do të rritet me 0.7 përqind këtë vit dhe 2.2 përqind në vitin 2010.
Duke e krahasuar aktualitetin me vitin 1989 kur komunizmi ra në Europë, studimi vlerëson se Shqipëria dhe Sllovenia janë dy vendet ish komuniste që kanë pësuar një rritje ekonomike deri ne 60 përqind, ndërsa pjesa tjetër e Ballkanit ka shumë rrugë përpara për të arritur këtë nivel.
Ekspertët vlerësojnë se çelësi i daljes nga kriza ekonomike për këto vende është bashkëpunimi rajonal.
Në këtë kontekst Shqipëria po bashkëpunon me Bullgarinë, Bosnjën dhe Malin e Zi në infrastrukturë dhe projekte të mëdha energjitike. /klan/