Shefi i asamblistëve të PDK-së në Komunën e Prishtinës, Leutrim Retkoceri ka thënë se PDK është pro shfuqizimit të vendimit për këmbimin e pronave në Badovc.
Ai në një fjalë para asamblistëve dhe pas largimit nga salla të asamblistëve të LDK-së, tha se sot është një ditë e bukur për kryeqytetin dhe kjo seancë e jashtëzakonshme na bashkoi në thirrjen e cila është thirrje kundër këmbimit të pronave në Badovc, vendim ky që ishte marrë me 21 dhjetor 2023.
“Ky vendim nuk ka arsyetuar interesin publik. Ne ishim dhe jemi kundër ndërtimeve në Badovc, dhe nuk mendoj që komuna ju ka borxh pronarëve të pronave private t’ju ndërroj tokat pa arsyetuar interesin publik. PDK ka qëndrim konsistent qysh në vitin 2020 kemi iniciuar seancë ku kemi kërkuar që Kuvendi Komunal të anuloj ndërtimet në Badovc. Në vitin 2021 nuk kemi përkrahur këmbimin e pronave në Badovc dhe njëjtë veprojmë edhe tani”, tha Retkoceri.
Retkoceri shtoi se “aspak nuk na shqetësojnë pozicionet politike të partive tjera por e rrezikshme është që fenomeni i tillë i dëmshëm të kthehet në normalitet”
“Ne sot të gjithë bashkë mund ta ndalim dëmin e vendimit të këmbimit të pronave që cenon interesin publik”, tha ai. /Telegrafi/