Kina ka bërë një reagim të mërkurën pasi presidenti i SHBA-së, Joe Biden iu referua presidentit Xi Jinping si një “diktator”.
Kështu, Pekini zyrtar ka thënë se komentet ishin absurde dhe një provokim, pas përpjekjeve nga të dyja palët për të ulur tensionet, shkruajnë mediat e huaja, përcjell Telegrafi.
Biden i bëri komentet e tij vetëm një ditë pasi Sekretari amerikan i Shtetit Antony Blinken vizitoi Pekinin për të stabilizuar marrëdhëniet që Kina thotë se janë në pikën më të ulët që nga vendosja e lidhjeve formale.
Duke marrë pjesë në një mbledhje fondesh në Kaliforni, Biden tha se Xi ishte shumë i zënë ngushtë kur një balonë e dyshuar spiune kineze doli nga kursi mbi hapësirën ajrore të SHBA-së në fillim të këtij viti.
“Arsyeja pse Xi Jinping u mërzit shumë kur e qëlluam atë balonë plot me pajisje spiunazhi”, tha Biden.
“Ky është një siklet i madh për diktatorët…”, ka shtuar më tej Biden.
Xi u bë udhëheqësi më i fuqishëm i Kinës që nga Mao Ce Duni, pasi siguroi një mandat të tretë si president në mars dhe si kreu i Partisë Komuniste në tetor.
Ai kryeson një sistem njëpartiak që shumë grupe të të drejtave të njeriut, liderë perëndimorë dhe akademikë e quajnë diktaturë, sepse i mungon një gjyqësor i pavarur, media e lirë ose e drejta e votës universale për poste kombëtare.
E Biden tha gjithashtu se Kina “ka vështirësi reale ekonomike”.
Kështu, një zëdhënëse e ministrisë së jashtme kineze tha se komentet e Biden ishin “jashtëzakonisht absurde” dhe “të papërgjegjshme”.
Duke shprehur pakënaqësinë e fortë të Kinës, zëdhënësja Mao Ning tha se komentet e Biden cenojnë seriozisht faktet, protokollin diplomatik dhe dinjitetin politik të Kinës.
“Ata janë një provokim i hapur politik”, tha ajo në një konferencë shtypi.
E pyetur se sa i vetëdijshëm kishte qenë Xi për lëvizjet e balonës, Mao përsëriti shpjegimin e mëparshëm të Kinës se kalimi i balonës përmes hapësirës ajrore të SHBA-së ishte i paqëllimshëm dhe i shkaktuar nga rrethana jashtë kontrollit të saj. /Telegrafi/