Deputeti i Lidhjes Demokratike të Kosovës, Haxhi Avdyli ka përshëndetur vendimin e Gjykatës Kushtetuese që vendi të shkojë në zgjedhje parlamentare, pasi vota e deputetit Etem Arifit nuk ishte legjitime.
Avdyli ka shpërndarë një fotografi me u.d e presidentes Vjosa Osmani, teksa ka shkruar se më nuk do të ketë linçime e poshtërime, transmeton Telegrafi.
“S’ka më më linçime, poshtërim, përjashtim nga ata që me marrëveshje prapa perdeve e tjetërsojnë vullnetin e vërtetë të qytetarëve. Qytetari i kuptoi të gjitha, s’mashtrohet më nga mashtruesit që 40 vite në politikë jetuan e vepruan duke mashtruar. Edhe 40 ditë për të pensionuar mashtruesin nga Rinia socialiste , sekretari krahinor, 3% e deri sot që bëri llugë skenën politike. Mashtruesi ka emër -Isa Mustafa. Ndryshimi ka emër Vjosa Osmani”, ka shkruar ai në Facebook.
Ndryshe, Gjykata Kushtetuese ka nxjerr aktgjykim pro kërkesës së Lëvizjes Vetëvendosje për shpalljen të pavlefshëm votimin në Kuvendin e Kosovës për zgjedhjen e Qeverisë Hoti më 3 qershor, pasi për këtë qeveri kishte votuar edhe deputeti Etem Arifi, i cili kishte një aktgjykim përfundimtar nga Gjykata e Apelit.
Gjykata Kushtetuese ka hedhur poshtë votën e deputetit Etem Arifi dhe ka urdhëruar u.d presidenten Vjosa Osmani, që të shpallë zgjedhjet e parakohshme në afat prej 40 ditësh. /Telegrafi/
