Reagime të politikanëve, ikonave të sportit dhe liderëve botërorë – pas vdekjes së Silvio Berlusconit

Silvio Berlusconi, ish-kryeministri i Italisë dhe manjati i biznesit, ka vdekur në Milano në moshën 86-vjeçare.

Politikanët, ikonat e sportit dhe liderët botërorë po i bëjnë homazhe figurës që transformoi politikën italiane dhe u bë i njohur edhe për skandalet e tij financiare dhe seksuale.

Më poshtë ua sjellim disa reagime të tyre:

Ndërsa kryeministri popullist i Hungarisë, Viktor Orban, tha në një postim në Twitter: “Iku luftëtari i madh”, kryeministrja e Italisë i tha lamtumirën Berlusconit në një video-mesazh, duke thënë: “Berlusconi ishte mbi të gjitha një luftëtar”.

“Ai ishte një njeri që nuk kishte frikë të mbronte bindjet e tij dhe ishte pikërisht ai guxim dhe vendosmëri që e bëri atë një nga njerëzit më me ndikim në historinë e Italisë”, ka thënë Georgia Meloni.

E Matteo Salvini, zëvendëskryeministri i Italisë, e quajti Berlusconin “një njeri i madh dhe një italian i madh”.

Matteo Renzi, ish-kryeministri italian dhe udhëheqësi i partisë politike liberale Italia Viva, tha në një postim në Twitter: “Silvio Berlusconi bëri histori në këtë vend”.

Lexo po ashtu Ndahet nga jeta ish-kryeministri italian Silvio Berlusconi

“Të gjithë sot duhet të pranojnë se ndikimi i tij në jetën politike, por edhe ekonomike, sportive dhe televizive ishte i paprecedentë”, shtoi ai, përcjell Telegrafi.

Ndërkohë Carlo Ancelotti, tani trajner i klubit të futbollit Real Madrid, tha: “Trishtimi i sotëm nuk i fshin momentet e lumtura të kaluara së bashku. Mbetet një mirënjohje e pafund për presidentin, por mbi të gjitha për një njeri besnik, inteligjent, i sinqertë, themelor në aventurën time si futbollist fillimisht dhe më pas si trajner”.

Ndryshe, Ancelotti fitoi Ligën e Kampionëve si trajner i Milanit kur klubi ishte në pronësi të Berlusconit.

Lexo po ashtu Jeta e shumëpërfolur e ish-kryeministrit të Italisë - disa nga "telashet" më të mëdha me të cilat u përball Silvio Berlusconi

Veç këtyre, një reagim ka ardhur edhe nga Roberta Metsola, presidente e Parlamentit Evropian, e cila iu referua Berlusconit si “luftëtari që udhëhoqi qendrën e djathtë dhe që ishte protagonisti i politikës në Itali dhe Evropë për breza”.

Kryeministri holandez Mark Rutte tha: “Italia ka humbur një personalitet të madh”.

Lexo po ashtu Rama reagon për ndarjen nga jeta të Berlusconit: Lamtumirë mik i mirë i Shqipërisë

“Ai ishte kryeministri i parë italian me të cilin punova dhe do ta kujtoj si një politikan të mrekullueshëm dhe pasionant”, tha ai në një postim në Twitter.

Si një ish-kryeministër i Sllovenisë, Janez Jansha, i shprehu ngushëllimet e tij për vdekjen e liderit italian, duke e cilësuar atë si një “mik të mirë të Sllovenisë”. /Telegrafi/