Ish-kryetari i Gostivarit, Nevzat Bejta ka dalë në konferencë shtypi me rastin e 100 ditëshit të qeverisjes së re lokale në Komunën e Gostivarit.
Ai shprehu indinjatë ndaj akuzave të bëra nga kryetari i tanishëm, Arben Taravari, duke konsideruar se përpos të pavërtetave, siç thotë ai, Taravari e ka rënduar, nënçmuar, ofenduar, jo vetëm atë, por edhe aktivistët e tjerë të BDI-së.
Bejta hodhi akuza ndaj Taravarit për paaftësi në menaxhimin me komunën në fjalë dhe për revanshizëm, duke larguar njerëz nga puna, e në vend të tyre të punësojë persona partiak.
Ish-kryetari Bejta kërkoi nga Taravari që të drejtohet në Gjykatë, nëse Bejta ka bërë shkelje, vjedhje dhe keqpërdorime në komunën e Gostivarit.
Për 100 ditëshin e qeverisjes, akuza ndaj Taravarit kanë drejtuar edhe Rilindja Demokratike Kombëtare (RDK).
Sipas RDK-së, Komuna e Gostivarit edhe më tutje vazhdon të jetë në pengmarrje. Dega e kësaj partie konsideron se Gostivari vazhdon të ngel në vend-numëro, përshkak të dy koncepteve të ndërtuara në baza personale, që kanë për qëllim kamuflimin e së vërtetës, duke tentuar të prezentohen disa “të vërteta” për këtë subjekt politik ose atë koncept, e gjitha në dëm të së “vërtetës për Gostivarin.”
Dega e RDK-së në Gostivar vlerëson se Gostivari do të vazhdoj të ngel në pengmarrje, deri në momentin kur do të thuhet “e vërteta për Gostivarin,” dhe jo vetëm njëra anë e së vërtetës./Telegrafi/