Ministri për Komunitete dhe Kthim në Qeverinë e Kosovës, Nenad Rashiq, deklaroi këtë të premte se formimi i Asociacionit të Komunave me shumicë serbe në Kosovë është obligim.
Në një deklarim për media, Rashiq tha se të gjitha marrëveshjet mes Kosovës e Serbisë të arritura me ndërmjetësimin e ndërkombëtarëve, duhet të respektohen.
Sipas tij, i mbetet ekzekutivit të gjejë formën se si do të bëhet Asociacioni, e cila është në favor të bashkëjetesës.
“Siç e kam thënë edhe më herët, në politikë dhe si institucione nuk mund ta anuloni të gjithë atë që ka ndodhur në mandatin paraprak, që do të thotë se ato obligime mbeten dhe ato obligime duhet të respektohen. Është tek ju ajo se çfarë forme, apo çfarë dizajni do të prezantohet ajo, kjo është diçka tjetër”.
“Në marrëveshjen e vitit 2015 thuhet se të gjitha këto marrëveshje duhet të jenë në harmoni me Kushtetutën dhe ligjet e Kosovës. Për mua kjo është bazë e mirë për Qeverinë e Kosovës që të punojë në atë drejtim”, u shpreh Rashiq para gazetarëve.
Ai tutje shtoi se duhet një tolerancë pozitive nga secili prej faktorëve në këtë aspekt, ndërsa shtoi se beson që do të mund të krijohet një draft i idesë së çka mund të jetë Asociacioni i komunave me shumicë serbe.
Rashiq foli edhe për largimin e serbëve nga institucionet e Kosovës. Sipas tij, ka mundësi ligjore për kthimin e tyre në vendet e punës.
“Një numër i konsiderueshëm i atyre që kanë dhënë dorëheqje nga vendet e punës, mund të riaplikojnë apo mund të gjejmë një bazë ligjore për t’i rikthyer në institucionet e Kosovës. Nuk janë përdorur të gjitha elementet ligjore për rikthimin e tyre, ka shanse të kthehen në vendet e punës, sidomos për stafin administrativ”, deklaroi ai. /Telegrafi/