Sergio Ramos thuhet se ka arritur marrëveshje për rinovimin e kontratës së tij me Real Madridin, por kjo marrëveshje ka ndodhur fshehurazi dhe në heshtje nga ai dhe presidenti Florentino Perez.
Mbrojtësi spanjoll kishte një rinovim të vështirë në verën e vitit 2015, por gjithçka ndryshoi një vit më vonë pas titujve të fituar dhe tani thuhet se ka arritur përsëri marrëveshje me presidentin e Real Madridit, Perez.
Sipas gazetës së njohur spanjolle Marca, nënshkrimi i marrëveshje nga Ramos thuhet se u bë në heshtje apo fshehurazi. Kapiteni i Realit dhe presidenti i klubit thuhet se janë kuptuar mrekullisht për një kontrate që zgjat deri në vitin 2021.
Kapiteni i Real Madridit është bërë më shumë se vetëm një lojtar. Mirëkuptimi i tij i plotë me Florentino Perezin dhe Zinedine Zidanen e kanë bërë atë të zë një vend bazik në drejtimin e përditshëm të skuadrës dhe madje edhe të klubit.
Ramosi arriti te klubi mbretëror në verën e vitit 2005 dhe që nga ajo kohë ka fituar të gjithë titujt e rëndësishëm duke u kthyer në lojtarin kryesor të skuadrës.
Tash pas nënshkrimit të kontratës së re, Ramos mund të përfundojë deri në 16 sezone si një lojtar i Real Madridit, duke hyrë përfundimisht në histori si njëri nga lojtarët me më shumë sezone me fanellën e bardhë.
Kapiteni i Real Madridit, me kontratën e tij të re, është pjesë e podiumit më të paguar të lojtarëve të tanishëm të Realit, me vetëm Cristiano Ronaldon dhe Gareth Bale që paguhet më shumë.
Ndryshe, Ramos që nga transferimi i tij në Santiago Bernabeu ka zhvilluar plot 533 ndeshje duke shënuar edhe 69 gola, shifër kjo shumë e lart për një mbrojtës. /Telegrafi/