“Do të triumfojë drejtësia edhe në rastin e regjimit aktual në Siri, sikurse ka ndodhë edhe në të gjitha luftërat, e edhe në Kosove ku me ndihmën e gjithë botes fitoi drejtësia”, ka thënë Ramiqi.
Ai ka mohuar raportimet në media se në xhaminë e fshatit Makoc të Prishtinës po bëhet mobilizimi i vullnetarëve të cilët po i bashkohen luftëtarëve opozitarë në Siri. “Kjo xhami kurrë nuk ka qenë në funksion as për t’i kryere ritet fetare e lëre më për qëllime të tjera, sepse ende nuk ka përfunduar ndërtimi i saj. Kjo është e vërteta”, ka thënë Ramiqi.
Sipas tij, në qarqe të caktuara po tentohet që të diskreditohet subjekti politik që ai i takon, duke përfshirë këtu dezinformata në media të shkruara dhe elektronike.
“Por, ne nuk brengosemi shumë sepse e dimë të vërtetën dhe i dimë qëllimet e kundërshtarëve të Lëvizjes dhe të Islamit. E ndërkohë, këto dezinformata e cenojnë sigurinë në vendin tonë, prandaj përpiluesit dhe përhapësit e këtyre dezinformatave mbajnë përgjegjësi për pasoja të mundshme”, ka thënë Ramiqi.
E ndërkohë, Ramiqi ka thënë se shkuarja e tij në anijen e ndihmave për Gaza ka qenë një ndër veprimet më humane dhe më të rëndësishme në jetën e tij. “Çdo veprim i cilido njeriu që kontribuon për ta luftuar padrejtësinë dhe të keqen, për mua është vepër jetësore”, ka thënë Ramiqi. /Telegrafi/