Drejtori i Institutit Kombëtar të Shëndetësisë Publike, Naser Ramadani ka bërë një paraqitje të shkurtër të situatës epidemiologjike në Kosovë.
Gjatë konferencës së përbashkët me Ministrin e Shëndetësisë, Arben Vitia dhe drejtorin e Policisë, Rashit Qalaj, ai ka thënë se epedimiologët kanë rekomanduar që deri në fund të muajit prill qytetarët të kenë kujdes të shtuar duke qëndruar në shtëpi, që të luftojnë virusin korona.
“Janë tri javë kritike, qytetarët gjatë këtyre të mos tubohen dhe të qëndrojnë në shtëpi”, ka thënë Ramadani.
Ramadani ka theksuar se të premten është thyer rekordi i Laboratorit të Mikrobiologjisë, teksa janë testuar 243 raste, prej të cilave 9 dolën pozitive.
“Duke e pasur këtë situatë, tashmë një muaj e tepër, me të cilën po ballafaqohemi intensivisht duke diagnostikuar dhe duke gjurmuar në terren të gjitha rastet që kanë të bëjnë me coronavirus, ne kemi arritur në këtë pikë me 135 raste pozitive, që i ka tejkaluar parashikimet tona, pasi që kemi menduar se do të kemi më shumë raste. Por, nuk ka vend për kënaqësi, derisa ta largojmë virusin nga vendet tona”, u shpreh ai.
Ramadani tha se janë bërë mbi 1700 testime që nga fillimi i përhapjes së coronavirusit. /Telegrafi/
